٣٠ ديسمبر – آه يا مسيو عامر، تقول إن الإسكندرية ليس كمثلها شئ! كلا، لم تعد (الإسكندرية) كما كانت على ايامنا، الزبالة الآن تُرى في طرقاتها!
– عزيزتي كان لا بد ان تعود الى أهلها 

الله يرحمك يا معلم نجيب .. ما لحقتش صفحات “مصر ايام زمان” و “روعتها المترونقة الفتاكة الفاضية من البشر” ع الفيس بوك ولا سخافات ووضاعة من يقولون الان وهم يلتهمون فراخ مقلية بيسموها بانيه “اصل احنا شعب ما يمشيش غير بالجزمة”. يللا بقى اصل دي كلها ناس بقت بتحب مصر اكتر من المصريين .. وبيحبوا مصر – مصر بتاعتهم دي يمكن عمرها ما كانت ولا حتكون – وف نفس الوقت بيكرهوا المصريين

٢٤ ديسمبر – رفضت محكمة النقض العسكرية اليوم طعن الناشر المصري خالد لطفي المحكوم عليها بالسجن خمس سنوات قضى منها عامان تقريبا حتى الان خلف الأسوار. نجمت محاكمة خالد المُدان بتهمتي “إشاعة أخبار كاذبة” و” إفشاء أسرار عسكرية” (في نفس الوقت .. اسرار واخبار كاذبة) بعد نشره طبعة مصرية من كتاب اسرائيلي عن أشرف مروان، رجل الاعمال والدبلوماسي السابق في الخارجية وصهر الزعيم عبد الناصر، وعلاقاته مع الموساد. كتاب “الملاك” للإسرائيلي يوري بار جوزيف، وقام بترجمته العربية دار نشر لبنانية.

An Egyptian Military Court today rejected an appeal by publisher Khaled Lotfi after he served two of his five-year sentence he received after printing Egypt’s copy of the Arabic translation of an Israeli book about Egyptian businessman and Nasser’s son in law Ashraf Marwan and Mr. Marwan’s complex relatIonship with the Mossad. The charges were “divulging military secrets” and spreading “false news” —- yes both at the same time. “The Angel” was written by Uri bar-Joseph. Arabic translation was published by a Lebanese house.

٢٤ ديسمبر – كل هؤلاء المهووسون بالخطط الإمبريالية الاستغلالية الامريكية هم من يرون في بشار الاسد قلعة الممانعة وفي بوتين عملاق روسي صاعد لإيقاف زحف الكاوبوي، ويرون في الويجور (الصين) جماعات ارهابية انفصالية والحديث عن اضطهادهم ووضعهم في معسكرات عمل مجرد fake news وجزء من خطة ترامب لاضعاف العملاق الصيني، وفي انتفاضة لبنان ثورة طالما لم تتحدى “السيد” الذي يقف للأمريكان بالمرصاد وساعتها تتحول لمؤامرة، والعراق (الذي صنع حدوده الاستعمار البريطاني) ضحية مؤامرة أمريكية تسعى لتفتيته، والاكراد كل الأكراد عملاء للصهاينة، وحفتر عنده جيش وطني من اجل ليبيا وقائد صالح مات بعد ان انقذ الحزائر والدولة … وطراخ طراخ بوم….  هؤلاء الناس في الحقيقة متسقون في جهلهم (راضون به وهو راض عنهم) وتتناغم كل مواقفهم القومجية اليسارجية الفصامية واللا اخلاقية.

٢٢ ديسمبر – عنوان رئيسي في صحيفة خبرية مصرية عن مذبحة وقعت من اكثر من ١٠٠ سنة على يد نظام سياسي اختفى من الوجود. أتوقع العناوين تبدأ تركز على خيانة أوروبا لمحمد على ومنعه من فتح القسطنطينية من ٢٠٠ سنة وبعدين نشرة التلفزيون الرئيسية تتكلم عن التقرير التشريحي لطومان باي على يد فريق ألماني استخرج عظام الشهيد .. أنا اشتريت كل الصحف بتاعة الاسبوع واليوم ولغاية دلوقت شفت خمس مقالات رأي سياسية بتتكلم عن سليم الاول .. وقنصوه الغوري وطومان باي ومرج دابق والعثمانيين الكلاب … والمدعين من اساتذة التاريخ ح يبقوا ضيوف التوك شوز والله يرحم ابطالنا المماليك الجراكسة ومؤسس مصر الالباني وينصرنا على الأتراك وجدهم ارطغرل وتحيا #ممالك_النار_والهرتلة

٢٠ ديسمبر – مجلة حورس التي تصدرها مصر للطيران قررت تفتخر بإنجازات عشر مصريين وتحط صورهم وعملوا ايه. وباستثناء السيدة غادة والي، اللي إنجازها وفق المجلة انها كانت وزيرة والسنة دي أصبحت رئيسة مكتب الامم المتحدة لمكافحة الجريمة والمخدرات، الباقين كلهم اتشهروا لما خرجوا برة وكلهم يمكن ما عدا النجم محمد صلاح اتعلموا برة ومنهم ناس هاجروا وهمّه اطفال (مينا مسعود كان عنده ٤ سنين مثلا).  طبعا مجلات زي التايم والنيوزويك وغيرها اختارت مصريات ومصريين كتير قبل كدة من ضمن شخصيات العام، ناس يستحقوا التكريم عشان عايشين في مصر أو اتعلموا في مصر ورغم الحياة الصعبة والتعليم السئ قدروا يعملوا حاجة لنفسهم وللناس اللي حواليهم وللعالم.

انا شخصيا مثلي الاعلى من ٢٠١٩ شاب مصري شفت فيديو عنه وهو رغم إعاقة كبيرة ف ساقيه الاتنين بيشتغل على توكتوك وبيضحك وبيكافح، وفي ناس كتير زيه. (الفيديو ف تعليق تحت بس موقع محجوب عشان !!!)

يللا كل الشكر لمجلة حورس وفريق العمل الضخم فيها واللي ترجم اسم فاروق الباز للإنجليزي فأصبح غادة والي!! وبعد جمع وطرح وضرب قال لنا ان محافظ البنك المركزي الأيرلندي جابرييل مخلوف المولود في مصر سنة ١٩٦٠ بقى عنده دلوقتي ٧٦ سنة!!!  بس سيبك انت الذ واقوى وأقدم واشرحنقش شركة طيران في المجرة يا #مصر_للطيران

٢٠ ديسمبر – تأسست منظمة المؤتمر الاسلامي بدعم ومباركة من المخابرات المركزية الامريكية وتنفيذ سعودي وصار مقرها جدة. تقوم يا اخي تدور الايام وينعقد مؤتمر قمة للدول الاسلامية في كوالالمبور هذا الاسبوع بهيمنة تركية إيرانية ماليزية وغياب سعودي وعربي عموما … غريبة الدنيا.

١٩ ديسمبر – مسلسل “تشيرنوبيل” حقق أعلى اعجاب من المشاهدين في تاريخ الدراما التلفزيونية الحديث وفقا لمجلة الايكونوميست رغم ان المسلسل تسجيلي ومفيهوش خيال. الانفجار اللي حصل اثناء اختبارات أمان في هذا المفاعل النووي السوفيتي الذي كان موجودا قرب كييف عاصمة أوكرانيا في ١٩٨٦ جعل المنطقة المحيطة مباشرة غير قابلة للسكنى لعشرين الف سنة وأرسل نظائر مشعة مضرة في الجو حتى إيرلندا وقتل وشوه وأثر على صحة عشرات الالاف. بس طبعا روسيا مش الاتحاد السوفيتي ومصر مش أوكرانيا والضبعة مش شيرنوبيل ويارب الفيلم بتاعنا ما يغلبش المسلسل بتاعهم.

١٩ ديسمبر – ليس عزلاً بل رفع حصانة وتوجيه اتهامات وارسال المسؤول المتهم للمحاكمة أمام مجلس الشيوخ، ولن يُعزل أو يُدان حيث يتطلب هذا أغلبية الثلثين اًو ٦٧ عضوًا وهذا مستحيل في ضوء ان الحزب الجمهوري المسيطر اساسا على اغلبية الشيوخ سيدعم طرمب عن بكرة ابيه. (لكن تعويرة في الوش برضه). بالمناسبة مجلس الشيوخ لم يُدّن الرئيسين الاتنين اللي نزعوا حصانتهم في تاريخ البلد (جونسون وكلينتون) ونيكسون استقال قبل حتى مجلس النواب ما يرفع الحصانة. مآساة ان الواحد يكتب ده عشان شاف موقع دولي باللغة العربية وناس محترمة كاتبين ان مجلس النواب الامريكي عزل الرئيس طرمب.

١٨ ديسمبر – صحفي مصري اسمه مصطفى شلش كتب مقالة في جرنان الاخبار اللبناني عن جنوب السودان مستندا على ما وصفه بانه تقارير من صحفي امريكي مستقل اسمه توماس ماونتين عايش وبيشتغل من اريتريا. في حاجة وقفتك في الجملة اللي فاتت؟ هه فكر تاني؟ 

“صحفي مستقل .. اريتريا”!!! ايه؟ بجد؟ البلد اللي مئات الالاف من شبابه وبناته بيهربوا ويمشوا على رجليهم عبر الحدود ويموتوا عشان يهربوا من حكم الديكتاتور الغريب اسياسي افورقي في اريتريا رأيهم ايه في الموضوع ده؟ رأيهم ايه في الصحافة الحرة المستقلة اللي يتتمرمغ في تراب بلدهم، البلد اللي دخوله صعب للغاية والخروج منه اصعب للغاية؟ البلد اللي لسه مسمي نفسه اشتراكي وح يقع على حاله حتت بعد ما الديكتاتور اسياسي افورقي اللي عنده ٧٣ سنة يموت. أفورقي اللي حاكم البلد من ٣٦ سنة يعني من ساعة ما اريتريا بقت بلد مستقل في سنة ١٩٩٣. 

بلاش ده كله .. الاخ الصحفي الامريكي السيد جبل (ماونتن) ده بيقولك بعضمة لسانه في تصريحات ان محدش بيصدقه عشان الناس بتكره اريتريا واحة الاشتراكية في القارة. آه بجد؟ الاتحاد الافريقي اشتكى اريتريا فعلا قبل كدة بس عشان كانت بتموّل وتدعم جهاديين مسلحين في الصومال نكاية في اثيوبيا مش عشان نظامها الاشتراكي الواقع ما بين كوبا والصين من اربعين سنة مثلا! بلاش ده كله .. انا رحت جنوب السودان عشر مرات على الاقل وقعدت كتير وقريت كتير وكلمت ناس كتير والكلام اللي بيقوله الاخ ماونتن وخلفه كاتب المقالة هبد في رزع،.

كاتب المقال في الاخر قال: “هل أنا من محبّي نظرية المؤامرة؟ نعم.” الصراحة حلوة بس اللي يحب نظرية يقدم ادلة عليها ولا حبك كفاية اننا نصدقك يا بطل؟ انا خايف لحسن حد تاني من المؤمنين بنظرية المؤامرة يتهجم عليك ويسألك مين اللي زقك او دفع لك يا بطل عشان بعد مطولتك عن جنوب السودان بيومين اتحفتنا بفرشة ملاية كبيرة لجلبير الاشقر واليسار المعارض لحافظ الاسد ولحزب الله والرافض الجلوس تحت مظلة الممانعة اللطيفة! اسف يا بطل اصل نظرية المؤامرة لحست دماغ ناس كتير وولاد الحرام في اليسار ما سابوس ارض صلبة كتير لولاد الحلال من اليسار يقفوا عليها!